صدفـــه

فاكر..

يوم ماجيت فى حياتى صدفة

يومها خطفت قلبى خطفه

وفــ ثوانى قلبت كيانى

وكل الكلام الحلو نطقه لسانى

صدفه..

أيوة كانت أحلى صدفه

وفــ عينيك الحب شايفه

حتى السكوت له ألف صوت

بيقول معانى سبقاها لهفه

لهفه..

قـد أيام وسنين طويله

عشتها فى أهات وحيره

تنده عليك ,,تترجى فيك

أوعاك فـ يوم تنسى وتقسى

هتنسى..؟

تنسى كان إيه إحساسي بيك

يوم مالمحت عينى عينيك

قالت بحبك من غير كلام

ورسمت مابينى وبينك سلام

ومن يومها حالفه

حالفه..

هافضل لحبك أحفظ وأصون

لايفرقنا غياب ولوم

وإن يوم سألت أنا إيه أكون

ده الكون فى كفه وانت فى كفه

mena_hassan

7-8-2016

رمضان شهر الخير

أتى شهر رمضان أتى شهر الخير

بالنهار نائم جعان وبالليل هاكل كتير

أتذكر جدتى عندما كنت لسه صغير

تطبخ لنا لحمة محمرة ونحلى بالفطير

فينطلق المدفع أجرى وأشرب العصير

ولاأنسى الخشاف كان فيه مشمش كتير

وأخى فى إشعال الصواريخ ده كان خبير

يرمى الصاروخ ويلسع إبن الجيران سمير

يأتى الجيران ليشتكوا ويتهمونا بالتقصير

فهل حق الجار أن يكون إزعاج وتكدير

وهذا شيخ الجامع شاطرفى القرآن والتفسير

زعقلنا فى المايك وقالنا بطلوا بقى تفجير

ذكريات رمضان جميلة من صلاة وتكبير

كم كانت أيام سعيدة والبيت كان كله خير

يشترى أبى اللحوم وفراخ وحمام بيطير

ويفاجئنى بفانوس أحمر من الحجم الكبير

أبى رجل عطوف كريم لايعرف التوفير

كانت أمى تلومة وتقولة ياراجل بطل تبذير

يقول لها متعجباً بطلى إنتى نكد وتكشير

سيبيها على الله ياستى ده ربنا كرمه كبير

ده العقل فى التفكير والرب فى التدبير

المهم يا أم منه لا ننسى يوما حق الفقير

mena_hassan

2-7-2016

على الشباك

علي الشباك

تملي أنا واقفة بستناك

 أسقى الوردة والفله

واستني منك ولو طلة

 تاخدني معاك

وناس في الرايحة والجاية

يشاوروا عليا ويقولوا

شاغلها هواك

تغيب عني تحيرني

 وعارف هاصبر اكمني

 روحي واخدها معاك

ياما ليالي تزعلني

تسكت ولامرة تفهمني

 بس أنا فهماك

 حتي لو بتكشيره

ونظرة عينيك دي تأشيره

تاخدني معاها للجنة

أعيش وياك

وهافضل يوماتي كدة استني

علي الشباك

mena_hassan

30-6-2016

قوليلى ازاى

يامصر قوليلى إزاى

أكون عايش جواكى

ودايب دوب فى هواكى

وتطلع شمسك الصبح

تنور أرضك وسماكى

أقوم من النوم حزين مهموم

وحضنك اللى كان دافى

بقى غربة وملوش ليه لزوم

قوليلى إزاى

يضيع الحق على أرضك

يموت الحلم قصاد نظرك

وتطلع كلمة بتنهيدة

تنادى على كانوا أهلك

سابوكى وهربوا على البلدان

وقالوا مبقاش لينا فيكى مكان

وفاتوكى هنا لوحدك

قوليلى إزاى أبوس إيدك

هايكون إزاى هنا عيدك

ولسه هناك

عيون تستنى حق شهيد

وأطفال بيمدوا لغيرهم إيد

وبين قضبان وسجن حديد

أسامى كتير بتنادى

فين حقى ودى بلادى

يضيع إزاى هنا عمرى

وأقضى حياتى وشبابى

فى ظلم وقهر

عشان قولت أنا حر

وماأقلبش فى يوم أتهان

ويقولوا ده عميل وجبان

قوليلى إزاى

يا بلدى أعيش فيكى

تكونى وطنى وأحميكى

وأنا خايف تبعينى

وأنا اللى بالغالى اشتريكى

mena_hassan

29-6-2016