كنت فرحة

كنت فرحة تترسم فى عيونى ضحكة

لما اشوفك كأن شمس الدنيا طالعة

 وقت اما كان الخوف مالينى

تيجى انت وتحلى ايامى و سنينى

والعذاب اللى عشتة قبلك

 اختفى لحظة ماشوفتك

كنت حب كبير فى قلبى

ليه بقيت طعنة بيجرى معاها دمي

كنت حلم اتمنى لوفضلت العمر احلمه

 وبسهولة جيت فى ثانية بكل قسوة تحطمه

يالى كنت فى عينيك بهرب من الدنيا ومافيها

والجروح بلمسة ايديك تشفيها

ليه بقيت كلمة تقتل فرحتى

ليه معاك دايما بحس بغربتى

كنت لون جميل يزين حروفى

مكنتش اعرف انه هايكون سبب لخوفى

يالى وجودك عن كل الناس كان مكفينى

ليه تضيع حب كان من برد الدنيا مدفينى

كنت فرحة عمرها فى يوم ما كملت

بقيت لى دمعه بعد حيره طويلة نزلت

على العموم كل الكلام ده مالوش لزوم

بعد المحبة جوايا منك بركان هموم

والذكريات بعد اما كانت على كل لون

بقت الدموع اللى ساكنه جوا العيون

mena_hassan

26-9-2016

غرقان فيكى

بيقولوا اللى بيشرب من نيلك

بيلف ويرجعلك تانى

وانا عايش عمرى بغنيلك

 مع انى سنين فيكى بعانى

وحاولت اصبرعلى مواويلك

لكنك دايما رفضانى

 هاهرب من ارضك ومسيرك

تعرفى ان انتى اللى طردانى

 وفى مركب هابعد واسيبك

مش هارجع وهاقول وحشانى

 وعشان روحى يابلدى فى ايديك

سابتنى ورجعتلك تانى

غرقان فى هواكى قصاد عينك

مع انك ديما كرهانى

مطرود من حضنك واسيرك

 وبلف ويرجعلك تانى

mena_hassan

23-9-2016

جوه العتمه ضى

عندما تسلبنا الأزمات كل طاقتنا وتسرق منا رغبتنا فى الحياة

تتهشم الأحلام ألف قطعة وتتناثر على أرض الأيام كـ البلور المكسور

تصاب الروح بالهشاشة وتفقد أى متعة فى الحياة 

أو رغبة فى إنتظار المستقبل

تستسلم بكل ضعفها لأوجاع تنال من كل ركن فيها

وتتهاوى مع رياح عاتيه لاتعرف إلى أين ستأخذها

ويصبح الأستسلام للوحدة لامفر منه

 فهو الملاذ الأخير لترتاح من نظرات البشر

تسير فى طريق العتمة وتجاهد لتجد مجرد شعاع نور

 يريحها من هذا العذاب واليأس المميت

لربما يضع الحظ أمامنا صديق يشد على أيدينا ليمر معنا

ونعبر من تلك الأزمة يكون هو العون فى الوقت المناسب

لكن نجاح التجربة يتوقف على مدى صدقة وأمانتة

وقدرته على الإستمرار فى الدعم المعنوى لك

ولربما كان هذا الشعاع قدر من الإيمان تشبعت به الروح

يكون الملاذ للفرار من تلك الحالة

 فبقدر الإيمان تكون سرعة الخروج من اليأس

فـ لكل أزمة مفر وملجأ ولكل منا ضوء يجب أن يبحث عنه

ليكون الدليل له للخروج منها بأمان

mena_hassan

21-9-2016

انت الغالى

ولاكان فى بالى أسهر ليالى

وآلاقيك ياعمرى بين يوم وليلة

حبى وحلالى

وحلمت بيك تكونلى بيت

 سندى وأبوعيالى

حضنك حنان مليان أمان

والدنيا ضحكالى

ده أنت اللى اتمنيته

وسنين استنيته يحلى ايامى

وبدعي طول العمر تبقالى

وعشان بحبك أنا جمبك مطمنه

ولايوم هاسأل بتحبنى..

لا ده أنا متأكدة

على فرحتى ناوى

لابنشغل يوم بحزن ولاهموم

وايه هايجرالى

عشان وياك فرحان قلبى

 ومرتاح بالى

كلمة بحبك اتعلمتها على ايديك

والعمر الجاى هاعيشه بس ليك

وان سألونى يوم عليك

هاقول ده حبيبى وكل آمالى

حبك ده نصيبى وقسمتى

وبيك هاتحلى حياتى ودنيتى

اصل انت الغالى

 اللى قلبى حبك ليالى

ومعاك الدنيا بتحلالى

mena_ hassan

20-9-2016

بقيت بخاف

بقيت بخاف

من ضحكة يجى بعدها فراق ودمعه

ومن يوم تهرب من عيونى بسمة ولمعه

أهرب فى ليل طويل من عيون جارحة

واستنى اشوف الشمس

 فى سمايا من بدرى طالعة

وساعات بشوف

فى كل الوشوش حواليامليون سؤال

وعشان أجاوب عليهم دة شئ محال

أسجن كلامي كله مابين أربع حيطان

وأعيش مابين حاضر واللي كان زمان

بقيت بخاف

أقرب من ناس بتحبنى

لحسن فى يوم فراقهم يهدنى

لكنى أوقات

بحن لقلب كان بيحبنى

وإحساس جميل بيضمنى

برغم البعاد وسنين عناد

لسه هواه جوايا ليه بيشدنى

وأفضل أخاف

من بكرا شايل بين ايديه

حاجة فوق الإحتمال

وهايفيد بإيه

ساعتها جاه ولا مال

لوتخونك قوتك

أو تنسرق من حياتك راحة البال

ومعناها إيه

تبقى شايف حلم لسه بين القلوب بيتولد

تتمنى يوم يكبروتقول علي الله هاعتمد

ويغيب كتير يوم اللقا

ويسيب قلوبنا متغربة ومتشوقة

لكنه الأمل

 عمره مافى يوم مات ولاانعدم

عشان إيماني بربنا

بيحي أي شئ كان في طريقة يتهدم

mena_hassan

6-9-2016