الإنسان الطيب اللي بيستحمل ضغوط وسخافات اللي حواليه ويعاملهم بما يرضي الله،يكظم غيظه وقت الغضب ويبعد عن اللي بيستفزه ويقفل مداخل الشيطان بينه وبين اللي بيفتروا عليه بالصبر والحِلم،بيشيل فوق طاقته ويحاول يعمل اللي عليه ويراعي ضميره،وبيكون مستني العوض والجزاء من ربنا لانه متمسك بدينه والقيم اللي اتربي عليها،الناس بتشوفه طيب ومقدور عليه وبالبلدي أهبل ونديله علي دماغه أكتر،وتلاقيهم عند اللي صوته عالي وقليل الأدب وبيشتم يخافو منه ويعملوله حساب،ده بيكون واضح أوى في أماكن العمل أو بين أفراد الأسرة أو حتي بين الأزواج، انتم عارفين الناس دي بتعمل إيه، بتهد في المجتمع وبتحط الناس الطيبه في صراع قاتل وفتنه داخليه بين وعد ربنا ليهم (الكاظمين الغيظ والعافين عن الناس والله يحب المحسنين) وبين إنهم ياخدوا حقهم بأيديهم وميتقالش عليهم ضعفاء وناس هبله، الناس دي شياطين الأرض اللي بيقلبوا الموازين ويغيروهم للأسوأ في لحظه لان مش كل واحد بيقدر يفضل طول عمره يعافر ويحارب لوحده وهو متشاف ضعيف وبيستقلوا بيه، فبلاش تراهن علي مساحة الطيبة جوا اللي قدامك لان في لحظة ممكن تخلص وتشوف واحد تاني ..
#mena_hassan
ليست هناك تعليقات:
إرسال تعليق