ست الكل

هى الإيد اللى بتطبطب على وجعى

تبكى لو شافت على خدى فـ يوم دمعى

ومين غيرها فى الدنيا دى شايل همى

دى ست الكل

تشترينى لو الكون كله راح وباعنى

هى الحضن اللى لما اجرى عليه يسعنى

ولما أزعل مين غيرها يفهمنى ويسمعنى

وبلاقى الحل

مش عاوزة من الدنيا غيرضحكتى

وبوجودها جمبى تكمل  فرحتى

حبها مالى عليا حياتى ودنيتى

ولافـ يوم قل

هافضل لآخر يوم فى عمرى أحبها

هى اللى نفسى أكمل حياتى فى حضنها

ومش بتساعنى الدنيا لما أندهلها

وعليا تطل

ربنا يخليها ويحفظها ليا

دى هى اللى ماليا الدنيا عليا

حبيبتى أمى دى ست الكل

mena_hassan

20-3-2017

انسان وحيد

رغم الهموم عايش وحيد

 بيدارى دمعه بين الجفون

عمره ما فكر يشتكى ألمه الشديد

ويقول خلاص

 جرحى عليهم ازاى يهون

ويشكى لمين وايه راح يفيد

ولا يوم يبان عليه انه الحزين

انه الضعيف رغم الأنين

يبان سعيد

مرسوم على وشه

ضحكة طايره فى السما

زعلان أوى لكن حياته مكمله

عايش عنيد

ازاى قدر..رغم الهموم

يرفض يعيش حزين مهزوم

واقف كما الصخرماسك فى الحديد

يزرع أمل وسط جبال

مليانه شوك

شايل ألم فوق الإحتمال

رافض يفوق

رافض يقول

محتاج لإيد محتاج سند

 ويعيش وحيد

mena_hassan

13-3-2017

ذكرياتنا

ذكريات مرت علينا

نفتكر ايامنا فيها

تترسم فى عيونا ضحكة

مهما كانت هى صعبه

عيشنا فيها جوا محنه

 بردو حلوه

 

حلوة قد ليالى فاتت

الكل كان فاكرها ماتت

 بس عايشة

 

عايشة جوا كل كلمة حب صادقه

بنفتكرها مع كل ضحكة صافية

تكبر معانا

 زى طفلة بريئة طاهره

ماتعرفش معنى الخاينه

ذكرياتنا

 هاتفضل باقيه طول حياتنا

مش هاننسى

مين حاببنا او مين بيقسى

ومين فاكرنا لسه

mena_hassan

1-3-2017

صلاحية قلب

فى عتمة الليل الطويل جلست تغزل رداء احلامها

وتطير بخيالها فوق الغمام تبحث عن ضياء نور يملأ قلبها

يبدد ظلام وحدتها ك قناديل حنين يعج ضوئها حنايا الروح

لطالما كانت هى إمرأة حالمه يمتلىء صندوق أحلامها بالأشعار

تستمد تفاؤلها من تلك الورود للتى تتسلق شرفتها

وتنتعش روحها من أصوات العصافير على الشجرة

التى تعمر حديقتها منذ ان خلق الحب بداخل قلبها

يذكرها المطر المتساقط على نافذتها بدقات قلبها عند رؤيته

فكانت تلك الليلة تجتاحها شلالات من الشوق

أغرق كل حصون التماسك بداخلها

دائما كان يكبرالأمل بداخلها أن القدر يحمل لها نرد الحظ ولو لليله

يأتيها طيفه ولو فى حلم يحمل تلك الإبتسامة الحانية

التى تحيى فيها قلب اوشكت أن تنتهى صلاحيته

لتعود خاويه اليدين إلا من الحنين

فتودع قمرها الباكى وتغلق ستائرها البالية من الإنتظار

وتنام داخلها تلك الطفلة التى قاسمتها الحلم ليالى طويلة

mena_hassan

16-2-2017

اجمل احساس

خبيني من الدنيا ومن كل الناس

ده انا عايشة معاك اجمل احساس

حلم حياتي لقيته انا فيك...

وهاقول للحزن بعدنا خلاص

خليك قصادى وشوفنى بعنيك

وفى عز ضعفى قوينى بيك

ده انا بنسي الدنيا وانا بين ايديك

وبحب روحى عشان هى فيك

عمرى ابتدى لما شوفتك

ونفسي اكمل حياتى جمبك

لوانت قريب او حتى بعيد

وقفت حياتى خلاص عليك

لو يوم خاصمتك تخاصمنى روحى

من غيرك ياعمرى يداوى جروحى

دى الدنيا حلاوتها عشان انت فيها

وحروف اسمى بتحلى لما تناديها

هاحكى عنك ولسه هاقول كتير

يالى من كل الناس عليك بغير

اخبيك فى قلبى وجوا عينى

وادعيلك انك تكون بخير

كل عام وانت حبيبى

14-2-2017

mena_hassan

فى عامنا الجديد

ونحن نخطو أولى خطواتنا فى عامنا الجديد

يتطرق إلى أذهاننا عام مضى بكل مايحملة من منغصات

مشاكل وأزمات مرت , فقدان وخسارات أطاحات بأحلامنا

ويهيىء لنا أنه ربما هذا العام لن يختلف كثيرا وربنا يكون أسوأ

ونمنى النفس ببعض من التفاؤل وكثير من الدعاء

أن يأتى هذا العام ومعه العصى السحرية

التى تحول مجرى حياتنا للافضل

الحياة لن تتغير بالتمنى ولن تحقق أحلامك فقط بالدعاء

وكل خسارة أوخيانة أو فقد تعرضت لهم

عليك أن تضعهم نصب عينيك لتتعلم من أخطائك

 والتجارب التى مررت بها فى سنوات مضت

وفى عامنا الجديد لنفتح نوافذ الأمل ليدخل منها هواء جديد

يحمل معه نسائم تشفى أوجاع وآلآلآم أهلكت أرواحنا

ولانقف عند نقاط وضعها أشخاص أو تجارب خلفهم

اللهم عاما دون ذنب ودون فقد ودون خيبه فى أمل

اللهم أيام مستبشره بلا كسره قلب ولاضيق بال

mena_hassan

4-1-2017