أدور بين وشوش الناس
على حاجات كانت حلوة
على بسمة
على ضحكة
على غنوة
ماألاقى غير أوجاع
وشكوى من اللى خان وباع
بخوف كبير مالوش آخـر
وأمل تايـه وشوق سافـر
وتنهيدة بـآهـ مكتومة
ونفوس مليانه ألم وضياع
وأيادى كتير بتتخانق
لعقول مش فاهمة بتعاند
وتسألهم عن الفرحة
وعن بكرة
تلاقيه ماهوش فارق
وهم الكل فيه غارق
أحبس نفسي فى أمنية
وحلم حلمته وماكان ليا
وأعيش فى الدنيا بتسابق
مع فرحة ودمعتى الحايره
أبص للسما فوق
وأسلم أمرى للخالق
وأستنى يوم طلوع الشمس
وأحقق حلمى بإيديا
صحيح دلوقت ماهوش فارق
لكن بكرة هاتتغير الدنيا
#mena_hassan
ليست هناك تعليقات:
إرسال تعليق