من أكبر المشاكل اللي بتواجهنا الفترة دي، هي إنحدار الأخلاق وإنتشار الحقائق المغلوطة بين الشباب، المفاهيم المشوهة اللي عايشين بيها كتير منهم إتجهوا لأساليب حياة فاسدة سواء تصرفات أو كلام فارغ، بيقتنعوا بالمعلومة الغلط بشكل سريع وتكون المفضلة ليهم،سيطرت على عقولهم بشكل كبير، ومن الملاحظ إن الميديا والدراما بتساهم بالنصيب الأكبر وبدأت تغير مسارها عن السنين اللي فاتت، لدرجة إنها أصبحت مصدر معلوماتهم أكتر من المدرسة والأسرة، وده يخلينا في أمس الحاجة لوجود (محارب الوعي) من أي وقت فات، يقدر يصحح المسار وينشر الوعي بطريقة تجذبهم ليه، يوجة الشباب نحو الحقائق والقيم لإنه طول الوقت بيسعى يعرف كل اللي بيحصل حوالينا، بيدرس كويس كل موقف أو حادث أو تريند، يكون ملم بميول الشباب وأفكارهم وحتى لغتهم لإنها وسيلة التواصل معاهم، محارب الوعي لايقل أهميه عن المجاهد فهو محارب بطريقة أخرى وأهم لأنه قادر يحول مجموعه أو جيل كامل للطريق الصحيح لو قدر يجذبهم إليه، يسمعهم ويعرف بيفكروا إزاي، يشجعهم على ترتيب أفكارهم ومنين يبدأوا، بدل مايتجهوا لأشخاص مجهولة الهوية والإنتماء غرضهم الحقيقي يضربوا العقيدة والوطنية بداخل أجيال مفروض هى اللي هتبني المستقبل، كل شخص فينا جواه محارب وعي يقدر يوظفه على حدود تعاملاتة لو قدر كل يوم يصحح معلومة أو يفهم شخص آخر حاجة مفيدة للمجتمع أو الأسره والبيئة، هنقدر نعدي من الأزمات اللي بتقابلنا، الوعي هو السلاح اللي تقدر تحارب بيه الجهل وتحافظ بيه على السلام والنجاح..
#mena_hassan
ليست هناك تعليقات:
إرسال تعليق