حب ايه؟

السلام عليكم ورحمة الله وبركاته
خلاص كلها ايام وعيد الحب يطل علينا
من يومين خرجت وشوفت المحلات وفيها الدباديب والهدايا
وعرفت ليه احنا شعب عايش على الهامش
وليه متأخرين فى كل حاجه
ازاى بنختزل الاشياء الجميلة فى مسميات وشكليات
الحب اللى مفروض  ارقى واسمى المشاعر اختزلناه فى هديه
لو ماجاتش يبقا مش بيحبنى ولو مافتكرتش يبقا مش على بالها
الحب اللى بيخاطب المشاعروالاحساس
بقا مرتبط بالماده سواء بين المحبين او لمايبدأوا يخططوا للارتباط
الهديه واللبس الاحمر الورد وكلام الحب
اللى مش مهم حتى لو كان مكرر اوكدب المهم يتقال
علاقات بنشوف المشاكل والخصام اكتر من التفاهم ونسميها حب
اتنين يفضلوا مع بعض برغم كل الاختلافات لمجرد انهم
بيقولوا بيحبوا بعض
ولوحصل وافترقواندخل فى مسلسل فضايح واهانات
وسباق مين هايحب تانى الاول
حب ايه ده؟
حب ايه اللى يستمر من غير تفاهم ومودة
من غير مايكون فيه قلبين بيخافوا على بعض
من غير ترفع عن الماديات والاهتمام بالعطاء والروح
حب ايه اللى يخليك تفرح بهديه عليها كلمة حب
من حد مش موصلك الاحساس ده
حتى الحب مش عارفين نحسه ولا نعيشه صح
وعيد الحب بقا زي عيد الام تمام
نتعبها طول السنه ويومها نديها هديه وتكون تقيله على قلبنا
على مانشتريها
من زمان وانا اقول التفاهم اهم من الحب لانه هو اللى بيوصلنا ليه
لكن حب من غير تفاهم وخوف وتضحيه بيموت
المحبه والمودة هى اللى بتدينا الراحه والامان
مش حب الكلام والهدايا وضحك على العقول
التفاهم هو اللى بيخلينا نستحمل التعب اللى بنشوفه منهم
ويخلنا نقدر نعدى اى ازمه بنمر بيها
بيخلينا نسامح ونغفر نخاف ونهتم
التفاهم والموده بيخلى الكلام يطلع من القلب بصدق
والحب يكون اعمق ومستمر
اتمنى السنه دى نعيش الحب ونحسه
 نعيشه مع اللى بنحبهم صح
وبدعى ربنا يهديلى حبايبى ويفضلوا على طول مالين عليا حياتى